Улаан-Үдэдэ хабдарта үбшэнэй диспансерэй барилгын асуудалнуудаар суглаан үнгэргэгдэбэ

Мүнөө элүүрые хамгаалгын һалбариин шэнэ эмхиин барилга дүүрэхэ туйлдаа хүрэбэ. Шэрдэлгэ-будалгын ажал хэгдэжэ, эмнэлгын хэрэгсэлнүүд тодхогдоно

Эмнэлгын хэрэгсэлнүүдтэ 500-гаад сая түхэриг һомологдоо. 2019 оной хоёрдохи кварталда шэнэ эмхи ашаглалгада тушаагдахаар хараалагдана.

Хабдарта үбшэнтэнэй диспансерэй поликлиникын барилгын асуудалнуудаар үнгэргэгдэһэн зүблөөндэ «Ехэ хэмжээнэй ажал хэгдээ, һүүлшын шата үлөө», - гэжэ Буряад Уласай барилгын болон гэр байрын ажахын сайд Николай Рузавин тэмдэглээ.

Улаан-Үдэдэ хабдарта үбшэнтэнэй диспансер 2011 оной август һарада «Элүүрые хамгаалга» гэһэн федеральна болон уласай программын хэмжээндэ баригдажа эхиһэн гэжэ һануулнабди. Тэрэнэй барилга хоёр шатада ябуулагдаа. 2013 оной май һарада лучевой терапиин байшан ашаглалгада тушаагдаа. Барилгын хоёрдохи шатада үдэрэй туршада 250 үбшэнтэндэ эмнэлгын туһа хүргэхэ аргатай поликлиникэ болон эмнэлгын-лабораторно корпус баригдаа юм. Барилгада бүхыдөө 4 миллиард 264 сая түхэриг һомологдоһон байна.

Онкологическа диспансерэй поликлиника хоёр дүрбэн дабхар байшанһаа бүридэнэ. Байшанай талмай хадаа 5 мянган дүрбэлжэн метрһээ ехэ юм. 2018 ондо поликлиникын барилгада 738 сая түхэриг һомологдоо, тэрэнэй 694 саянь – федеральна бюджетһээ, 44 сая түхэриг уласай бюджетһээ һомологдоо. Хизаарламал харюусалгатай «Ремстрой» бүлгэм барилга ябуулна.

Буряад Уласай элүүрые хамгаалгын яаманай мэдээсэлээр, улас дотор хабдарта үбшэнһөө 100 мянган ажаһуугшадай 178-ниинь наһа барана. Ородой Холбоото Уласай ажаһуугшадай энэл тоодо 192 хүн наһа барана гээд мэдээсэгдэнэ.