Москвагай ба Бүхы Оросай Патриарх Буряад Уласта туһа хүргэхөөр найдуулба

Буряад Уласай Толгойлогшо Вячеслав Наговицын болон Улаан-Үдын ба Буряадай архиепископ Савватий хоёр Москвагай ба Бүхы Оросой Патриарх Кирилл гэгшэтэй уулзажа һая ерээ

Дээдэ санаартан Улаан-Үдэдэ Кафедральна һүмэ барилгые, мүн шэнэ епаархи байгуулха тухай эдэбхи үүсхэлыень ехэтэ дэмжээ. Тэрэшэлэн, Байгал далайн эрьедэ оршодог Посольскын хиидтэ туһалжа байхаар найдуулһан байна.

Улаан-Үдын ба Буряадай Үнэн алдартанай хамжаанай (епаархиин) байгуулагдаһаар 2014 ондо табан жэл гүйсэбэ. Мүнөө сагта епаархиин бүридэлдэ 75 һүмэ харьяатантаяа тоологдоно. Һүүлэй жэлнүүдэй туршада санаартанай тоо хоёр дахин дээшэлээ.

Жиндагуудшье эгсэ олошороо. Тиимэһээ 2013 ондо Улаан-Үдэдэ кафедральна гэжэ гол һүмэ баригдажа эхилһэн байгаа. Олоной хамһалсаһанай ашаар һууринь табигдажа, ханануудынь үндыжэ захалаа. Туһа дэмжэлгэ олгуулха зүблэл бүридхэгдэнхэй. Энэ мэтые дуулахадаа Үндэр санаарта Патриарх тус барилгада туһалха тухайгаа найдуулба.

Уулзалгын үргэлжэлдэ Буряад Уласай дэбисхэр дээрэ үшөө нэгэ епаархи байгуулха тухай хөөрэлдөөн болоо. В.В. Наговицынай тэмдэглэһээр, Буряад Улас хадаа – нилээд ехэ газартай. Гэхэтэй хамта, Улаан-Үдын Үнэн алдарта хиид һүмэнүүдые хүтэлэгшын харьяата газар бүхы Буряад Уласай дайда дэбисхэртэй тэнсүү зэргэ болошонхой. Эгээл тиимэһээ холо саагуурхи нютаг нуганууд харгалзагүй шахуу үлэшэхэ баатай.

«Эндэ хэлэгшыетнай дэмжэнэб, шэнэ епаархи байгуулхи шухала», - гээд Гэгээн түрэлтэ Патриарх хэлэбэ.

Гадна, Посольскын хиид тушаа асуудал харагдаа. Тэндэ эрэшүүлэй хиид хүгжөөхэ хүсэлтэйгөө республикын толгойлогшо мэдүүлһэн байна. Энэ хиид зүүн зүгэй оронууд руу эльгээгдэһэн элшэн сайдай зам харгыдаа байрлажа амарха түб байһан гэхэ. Түүхын бусадшье баримтанууд энээн тухай олон, тэрэ тоодо Бээжэн хото зориһон санаартанай тусхай түлөөлгэтэ 19 албан зургаан харгыдаа тогтожо, эндэ сайлаһан түүхэтэй агша. Москвагай ба Бүхы Оросай Дээдэ санаартан Кирилл анхан Смоленскын ба Калининградай митрополидай алба хаажа байхадаа 2004 оной сентябриин 28-да Посольскын энэ хиидтэ уншалга бүтээһэн байна.

Һүүлэй үедэ Посольскын хиидтэ һэльбэн шэнэлэлгын ажал эршэдээ гэбэл, 1995 ондо Гэгээн Николайн һүмэ дотор үнэн алдартанай маани уншалганууд захалһаар, хожомынь, 2000 ондо эндэ хиид байгуулагдаһан гэхэ. Ородой Холбооной Уласай гадаадын хэрэгүүдэй яамнай аша туһаламжаар энэ ажал яһала урагшатай ябуулагдана. Москвагай ба Бүхы Оросай Патриарх Кирилл өөрын талаһаа мүн лэ туһа хүргэжэ байхаар бата найдуулба.