Буряад Уласта сайдуудай тушаал эзэлхэ конкурсдо 118 мэдүүлгэ оробо

Буряад Уласай Толгойлогшын болон Засагай газарай захиргаанда сайдай тушаал эзэлхэ конкурсдо мэдүүлгэ оруулха болзор дүүрэбэ

Тэрэнэй дүнгүүдээр, сайдай тушаал эзэлхэ конкурсдо 118 мэдүүлгэ ороһон байна. Үндэр тушаал эзэлхэ конкурсдо Буряад Уласай мэргэжэлтэдтэй хамта баруун зүгһөө хүнүүд хабаадалсана гэжэ мэдээжэ.

Тиихэдэ шэнэ байгуулагдаһан Аяншалгын сайдай тушаалда – 42, Эдэй засагай сайдай тушаалда – 30, Элүүрые хамгаалгын сайдай тушаалда – 19, Соёлой сайдай тушаалда – 15, Спортын болон залуушуулай бодолгын талаар сайдай тушаалда 12 мэдүүлгэнүүд оробо.

Буряад Уласай Толгойлогшо Алексей Цыденов Буряадай гүрэнэй телевиденидэ интервью үгэхэдөө, сайдай тушаал эзэлхэ хүнүүдтэ шанга эрилтэнүүд табигданхай гэжэ хэлэһэн байна. Яамануудые хүтэлбэрилхэ дуратайшуулай дунда уласай мэргэжэлтэд болон баруун зүгһөө хабаадагшад бии гэжэ уласай хүтэлбэрилэгшэ тэмдэглэбэ. Буряад Уласай аймагуудай зарим засаг дарганар конкурсдо хабаадаха тухайгаа мэдүүлһэн байна.

Яаман бүхэндэ үндэр тушаалтаниие шэлэн абаха комисси байгуулагдажа, комиссиин гэшүүд конкурсдо хабаадагшадтай, тэдэнэй дурадхаһан программануудтай танилсаха. Комиссиин бүридэлдэ Буряад Уласай Засагай газарай Түрүүлэгшын орлогшонор, Арадай Хуралай, Яамануудай дэргэдэхи олониитын зүблэлнүүдэй, Олониитын танхимай болон һалбаринуудай эблэлнүүдэй түлөөлэгшэд орохо юм. Ородой Холбоото Уласай Юрэнхылэгшын дэргэдэхи Арадай ажахын болон гүрэнэй албанай Ородой академиин мэргэжэлтэд түгэсхэлэй шатада тестированиин аргаар сайдай тушаал эзэлхэ конкурсдо хабаадагшадые шалгаха. Тиихэдэ Буряад Уласай Толгойлогшо Алексей Цыденов хабаадагша бүхэнэй дансанууд болон программануудые хараха.

Гүрэнэй үндэр тушаал эзэлгшэдтэ туршалгын болзор гэжэ байха ёһогүй гэжэ уласай хүтэлбэрилэгшэ тэмдэглэһэн байна.