Улаан-Үдэ хотодо халуун уһан августын 20-до бии болохо

Мүнөө Улаан-Үдэдэ айхабтар ехэ заһабарилганууд хэгдэжэ байна. Халуун уһа августын 5 болотор гэрнүүдтэ үгэхэ аад, тэрэ үдэрээ августын 12 болгоо. Теэд заһабарилгын ажалнуудай хэгдэжэ байхада үшөө нэмэлтэ бэрхэшээлнүүд гаража ерээ, тэрэнэй түлөө халуун уһа үгэхэ үдэрынь 20 болотор хойшололуулагдаба.

Дулаа дамжуулдаг соргонууд үмхиржэ һалаһан байгаа, үбэлэй сагта коммунальна аюл болоходоош магад һэн. Һэльбэн шэнэдхэлгын проект соо соргонуудые хушадаг лотоогуудай 30 процентынь шэнэлхэ байгаа. Сахьяновагай гудамжаар лотогуудые харахаяа газарынь задалхадамнай, тэндэнь оройдоошье лотогууд үгы байба. Тэрэнэй орондо хирпиисээр дэлгээгдэһэн байжархео. Соргонууд үргэлжэлхэдээ асфальтаар хушаатай харгы доро ороо, харгы задалхагүйн түлөө соргонуудые шэнээр харгын хажуутээгуур гаргаха гэһэн шиидхэбэри абагдаа гээд Улаан-Үдын хотын ажахын хорооной түрүүлэгшын уялгануудые дүүргэгшэ Александр Тюрюханов хэлэнэ һэн.

Мүн тиихэдэ элдэбын соргонууд олдожорхео. Тодорхойлбол, Сахьяновагай гудамжаар ябаһан соргонууд худалдаа наймаанай Гвоздь дэлгүүр доро орошоһон байгаа. Энэ ушараар соргонуудые сусажа абаха нэмэлтэ ажал бии болоо.

Ключевской гудамжаар газар малталгын үедэ ажалаа үргэлжэлүүлгэдэнб һаалта болоһон нэгэ сорго туталдаа. Тэрэнэй хажуугаар энэл гудамжаар соргонууд уһан соо байгаа. Юуб гэхэдэ газар дороһоо уһан гарадаг байба. Ажалаа үргэлжэлүүлхын түлөө проект хубилилгада саг һалаһан байна.

Советскэ районой арад зондо заһабарилгын ажалнуудай дүүрхэдэнь тэрэ дороо халуун уһан үгэгдэһэн байна. Мүнөө дээрээ 2-дохи магистральда соргонуудые газаа талаһаань дулаасуулгын ажалнуууд хэгдэжэ байна, саашань лотогуудаар хушаха, тэрэнэй һүүлээр шоройгоор булажархиха. Тиин Советскэ райондо Партизанская гудамжаар олон дабхар гэрнүүдтэй 29 байшангуудта халуун уһа үгэхэнь үлөөд байна.

Александр Тюрюхановай хэлэһээр, Сахьяновагай болон Ключевская гудамжануудта хэгдэһэн ажал номой еһоор хоер һара соо хэгдэдэг юм. Харин бидэ тиимэ удаан халуун уһа болюулаад байжа шадахагуйбди. Урид хэлэгдэһэн багахан болзор соо заһабарилга хэхэбди гэжэ үгэдээ хүрэжэ шадаагуйбди, бэрхэшээлнүүд тобойсо гаража ерээбшуу даа.

Октябрьска райондо августын табанһаа 139 гэр халуун уһанда тодхогдоо. Үшөө 623 олон дабхартай гэрнүүд үлэнхэй.

Мүнөөдэр, августын 14-дэ Карла Марксын бульваараар, Бабушкинай, Терешковагай, Павловай, Солнечная, Спартагай, Зоя Космодемьянскаягай гудамжануудаар бүхыдээ 93 гэр халуун уһатай болохо.

Бүхы гагнуурай ажалнууд августын 18 болотор дүүргэгдэхэ түсэбтэй. Тэрэнэй һүүлээр соргонуудаа уһаар дүүргэжэ эхилхэ, тэрэ ажалдань 2 үдэр гараха.

Хотын захиргаанай хүтэлбэрилэгшын уялгануудые дүүргэгшэ Олег Екимовскиин хэлэһээр Октябрьска райондо болон бүхыдээ Улаан-Үдэдэ августын 20до үэгэдэхэ, 19-дэ ганса халуун уһан соргонуудаар үгэгдэхэ юм. Хэзээ халуун уһан үгтэхэб, саг, үдэрыень хэлэгты гэжэ хүн зон хэлэнэ, тэдээнэдэ ямар ажалнууд хэгдэжэ байүан ушарнууд һонирхуулнагуйбшуу даа гэжэ Екимовскин нэмэнэ һэн.

ТГК-14 болон хүтэлбэрилхы эмхинүүдтэй хэлсээнэй еһоор август һарын түлөө халуун уһанай түлбэри, счетчиг үгы зондо, халуун уһанай болюулагдаһанһаа бии болоһон үдэр болотор тоологдохогуй гээд Александр Тюрюханов хубаалдаа. 

Хэдэн жэл соо анха түрүүшынхиеэ «Россиин можо хизаарнуудай коммунальна болон инженернэ инфраструктурын хүгжэлтэдэ» гэжэ гүрэнэй «Россиин хүн бүхэниие һайн шанартай гэрээр, коммунальна хангалтаар хангаха » программаар хотодо 1 млрд. 915 млн. 484 мянган түхэриг бюджетнэ һанһаа үгтэһэн байгаа. 

Энэ жэл 348 миллион федеральна, 77 млн. 85 мянган түхэриг Уласай болон хотын бюджедүүдһээ үгэгдэһэн байгаа.