«ЛокоТех» компанитай ажалаа суг ябуулха тухай Буряадай Толгойлогшо хэлсээ баталба

Санкт-Петербург хотодо үнгэргэгдэһэн эдэй засагай уласхоорондын хуралдаанда Буряад Уласай Толгойлогшо Алексей Цыденов болон «ЛокоТех» компаниин юрэнхы захирал Юрий Дегтярев уласай ниигэмэй-эдэй засагай тогтууритай хүгжэхын тула жэлэй туршада ажалаа суг ябуулха тухай хэлсээ баталба. Тиихэдэ Улаан-Үдын ЛВРЗ-дэ мүнгэ зөөри оруулха болон ажалаар хангаха асуудалнуудаар, уласай дэбисхэртэ нөөсын, зөөриин-оньһон хэрэгсэлнүүдэй болон мүнгэн һангай бааза байгуулха талаар ажал суг ябуулха тухай хэлсэбэ

Буряад Уласай Толгойлогшо Алексей Цыденовэй тэмдэглэһэнэй ёһоор, Улаан-Үдын ЛВРЗ ниигэмэй харюусалгатай үйлэдбэриин жэшээ болоно, уласта мүнгэ зөөри оруулалга дэлгэрүүлхэ талаар горитой хубитаяа оруулдаг юм.

«Бидэ харюусалгата ажалайнь түлөө компанида баяр хүргэнэбди. Хэлсээнэй ёһоор үйлэдбэриин болон ниигэмэй һалбарида ажалаа суг ябуулхабди. Тиихэдэ «Желдорреммаш» бүлгэм улас дотор тамир хүгжөөхэ талаар, ЛВРЗ-эйн талмайда залуушуулые, оюутадые эдэбхитэйгээр хабаадуулха ажал ябуулха дурадхал оруулаа», - гэжэ Алексей Цыденов хэлэбэ.

Уласай хүгжэлтэдэ завод ехэ удха шанартай юм. Энэ үйлэдбэри хадаа ехэ татабари түлэдэг эмхинүүдэй нэгэн гэжэ «ЛокоТех» компаниинуудай бүлэгэй юрэнхы захирал Юрий Дегтярев тэмдэглэбэ. Тиихэдэ хэлсээнэй ёһоор, уласай дэбисхэртэ экологиин байдал һажаруулха талаар түсэлнүүд бэелүүлэгдэхэ.Улаан-Үдын ЛВРЗ-дэ локомотивуудай заһабари, һэльбэн шэнэдхэлгэ хэдэг, заһабариин хэрэгсэлнүүдые үйлэдбэрилдэг, заһабариин шэнэ технологи нэбтэрүүлдэг юм. Хойто зүгэй түмэр замай харгынуудһаа эхилжэ, Алас Дурна зүгэй түмэр замай харгынууд локомотив болон вагоннууд Улаан-үдын заводто зааһбарилагдадаг. Тиихэдэ заһаабариин хэрэгсэлнүүд СНГ-эйн гүрэнүүдтэ болон Монгол улас дамжуулагдадаг.

2017 ондо заводто 871 локомотивуудай секци заһабарилагдаа. 2018 ондо 900 секци заһабарилжа түсэбтэй. 2018-2020 онуудта Улаан-Үдын ЛВРЗ-дэ мүнгэ зөөри оруулалгын программын хэмжээн хадаа 932,716 сая түхэриг юм. 2018 ондо 469,683 сая түхэриг мүнгэн һомологдохо түсэбтэй. Мүнгэ зөөри оруулалгын түсэбэй ёһоор, заводой үйлэдбэриин хэрэгсэлнүүдые һэльбэн шэнэдхэгдэжэ, заһабариин ажалай шанар дээшэлүүлэгдэхэ.

2017 ондо Улаан-Үдын ЛВРЗ Ородой Холбоото Уласай бюджедтэ 445,9 сая түхэриг налог татабари түлэһэн байна. Тэрэ тоодо, Буряад Уласай бюджедтэ 443,9 сая түхэриг. 2018 ондо 501,2 сая түхэриг татабари түлэхэ гэжэ түсэблэгдэнхэй. Тиихэдэ ЛВРЗ хадаа ажалай эгээл олон һууринуудаар хангадаг томо үйлэдбэринүүдэй нэгэн юм. эндэ 6 мянганһаа дээшэ хүн хүдэлмэрилдэг.