​Буряадай Толгойлогшо Алексей Цыденов Беларусь уластай ажалаа суг ябуулха тухай хэлсээнүүдые баталба

Буряад Уласай Толгойлогшо Алексей Цыденов октябриин 10-һаа 12 болотор үнгэргэгдэһэн Беларусиин можо нютагуудай V хуралдаанда Брестскэ болон Гомельско можонуудай гүйсэдхэхы хороонуудай түрүүлэгшэнэр Анатолий Лис болон Владимир Дворник гэгшэдтэй хэлсээ баталһан байна

Хэлсээнэй ёһоор, худалдаа наймаанай-эдэй засагай, эрдэмэй техническэ, гуманитарна һалбаринуудта ажал суг ябуулагдаха юм.

- Хэлсээнэй ёһоор, худалдаа наймаанай, олзын хэрэг эрхилэлгын, болбосоролой, хүдөө ажахын һалбаринуудта ажал суг ябуулагдаха. Тиихэдэ хүдөө ажахын һалбариин хүдэлмэрилэгшэд дүй дүршэлөөрөө андалдаха, соёлой бүлгэмүүд гастрольнуудта гараха, аяншалга эмхидхэгдэхэ гэжэ түсэблэгдэнэ, - гэжэ Буряад Уласай эдэй засагай яаманай гадаадын харилсаанай хорооной түрүүлэгшэ Евгения Новикова хэлэбэ.

Баталагдаһан хэлсээндэ эдэй засаг хүгжөөхэ талаар программа болон түсэлнүүдые бэелүүлгэдэ мүнгэ зөөри оруулха, мүнөө үеын оньһон хэрэгсэлнүүдые нэбтэрүүлхэ, соёлой һалбарида харилсаа бэхижүүлхэ, болбосоролой һалбарида шэнжэлэлгын ажалнуудые суг ябуулха тухай хэлэгдэнэ.

Беларусиин можо нютагуудай V хуралдаанда Ородой Холбоото Уласай хоринһоо дээшэ можо нютагуудай хүтэлбэрилэгшэд хабаадаһан байна.